محارة عازلة للصوت gyproc gyplast

اه فى محارة عازلة للصوت

طب اية استخدامتها و لية و ازاى

اولا: استخدامتها

على سبيل المثال فى الموقع عندى (كنت بشتغل فى فندق ٧ نجوم) المفروض ان بين الغرف و بعضها مفيش صوت يتنقل خالص و لما جينا عملنا اختبار الصوت سقط و كانت مشكلة وهنا الشركة جبتلنا شركة من الباطن اسمها

gyproc gyplast

و الشركة كانت توريد فقط و دى عازلة للصوت

ثانيا: طريقة تطبيقها

بتتكون من ٣ طبقات على ٣ مراحل

gyplast fill - gyplast mortar - gyplast top

و طريقة العجن هى تفريغ الشكارة فى تكنة (نص برميل) و اضافى مياة حسب الحاجة يعنى ملهاش معيار معيين

gyplast fill:اولا

دى بتبقى اول طبقة زى التلبيش كدة بس بتبقى خشنة شوية و بتنفرد زى المحارة عادى و بتتشطب بالدراع

gyplast mortar:ثانيا

دى بتبقى زى طبقة تنعيم شوية و ممكن تستخدم فيها الدراع او البروة

gyplast top:ثالثا

دى الوش النهائى الناعم و ممكن تستخدم فيها الدراع او البروة

ميزة المادة دى انها مش بتحتاج معجون كدة خلاص انت بعد ما بتخلص اخر وش بتجيب النقاش عشان يلقط اى حاجة محتاجة ترميم بس بردو بنفس المادة و بعد كدة تخش سلسير و بطانة

عيبها ان الجانب الواحد بياخد من المبيض من ٣ ل ٤ ايام شغل فيه على عكس المحارة العادية هو يوم واحد

طريقة التجهيزات هى هى زى المحارة بالظبط سواء بؤج و اوتار و سلك شبك و اعمدة الفرزبيكو