تركيب رخام او سيراميك للارضية و الحوائط

تركيب رخام و السيراميك للحوائط

 بالنسبة لتركيب رخام الحوائط فتثبيته ليه ٣ طرق اولا بسقية المونة او بمادة لصق او تركيب ميكانيكى و دة هنتكلم عنه بعدين

بالنسبة لتركيب السيراميك للحوائط فتثبيتة ليه طريقتين اولا بلصق المونة او بمادة لصق

 خلينا نتكلم عن الرخام و السيراميك مع بعض فى طريقة التثبيت بمادة اللصق لان مفيش فرق بينهم

عشان تشتغل لصق سيراميك او رخام على الحائط ف لازم الاول تبيض الحائط و لازم يكون مستوى المحارة ممتاز لان اى عيب فى تشطيب المحارة هيظهر فى تركيب الرخام او السيراميك و لازم تكون عارف كويس الفراغ دة جاى رخام ولا سيراميك عشان تعمل حسابك فى بروز علب الكهرباء لان  سمك الرخام غير سمك السيراميك و بعد كدة لازم تكلم المساح يجى يعلملك الشرب (المنسوب) عشان تعرف انت مستوى التشطيب بتاعك فين عشان تعرف تقسط الجنب بتاعك و تقلل الغلايق ، خلاص احنا كدة جاهزين للتركيب فى مواد انا شخصيا اشتغلت بيها اسمها سيكا سيرم و سيكا لاسكا و فى انواع من الجراوت بتستخدم فى اللصق بردو و دى بتيجى شكاير زى الاسمنت كدة و بتتخلط بشوية مياة و تتفرد على الحائط بالبروة و تثبت عليها البلاطة

بالنسبة لتثبيت الرخام بسقية المونة

دة يعتبر النوع البلدى فى التثبيت و بيتم كالتالى بيتم حفر حتة صغيرة كدة فى ظهر الرخامة و بيتم تثبيت فيها كانة اسمها كانة سلك بتبقى عبارة عن سلكة كدة جامدة شوية و تكون مجلفنة (ضد الصداء) و بتلصقها فى الرخامة بكولة و بعد كدة بتثيت بلاطات الرخام تثبيت مبدئى بشوبة جبس و مراجعة الافقية و الرأسية و بعد كدة بيتم ملو الفراغ اللى بين الرخام و الحائط اللى هو مش اقل من ٣ سم مثلا بالمونة و يفضل يكون اسمنت ابيض مش اسود عشان الرخام ممكن يشرب اللون و يغير لونه و بيتم سقيه الجانب على اربع مرات عشان مايضربش

بالنسبة لتركيب الرخام او السيراميك للارضية

لازم لازم لازم و مهم جدا تكون عارف الفراغ اللى انت شغال فيه و لازم تكون عارف هل الفراغ دة فى عزل رطوبة (عزل مياة) ولا لا عشان ماتركبش السيراميك او الرخام و بعد كدة تكسرة عشان تعمل العزل

لازم بردة تكلم المساح يعلملك الشرب عشان تعرف مستوى تشطيب الارضية منسوبه فين بالظبط و سواء السيراميك او الرخام للارضية بيركب بمونة فقط بس بردو يفضل بالنسبة للرخام اسمنت ابيض

فى حاجة فى تركيب السيراميك اسمها صلايب دى بتبقى فى مستوى التشطيب العالى دة بتبقى عبارة عن حتة بلاستك على شكل + بتتحط بين بلاطة و بلاطة عشان تحافظ على مسافة العرانيس) الفراغ بين البلاطات)