اسئلة المقابلات...بند المحارة

خلصنا بند المبانى و الحمدلله سلمنا الشغل للاستشارى نبدأ فى البند اللى بعده بند المحارة او كمة يقال بلغة الموقع بند البياض

اولا التحضير

بيتم الاول غسل  الحيطة بالمياة عشان نشيل التراب و نشتغل على نظافة و بعدين بتم الطرطشة و الافضل طبعا الطرطشة  بالمسطريين مش بالكوز ولازم تكون الطرطشة خشنة او كما يقال بلغة الموقع شحمة دة بالنسبة للتجهيز الشغل على الطوب او البلوك اما بالنسبة للتجهيز على الخرسانات سواء اعمدة او كمر لو كنت شغال خرسانة ملساء بخشب الكونتر فلازم تتزمبر عشان المحارة تمسك اما لو شغال خرسانة بلدى بخشب لتزانة ف مش هتحتاج زمبرة

بعد كدة لازم تعمل سلك شبك بين اى خرسانة و مبانى عشان تمنع تنميل البياض فيما بعد و السلك بيتثبت بمسامير فشر و بتبقى على شكل رجل غراب
بعد كدة تبدأ فى البؤج و الاوتار و لازم تبقى موزونة و خيط خلصنا التجهيزات و سلمناها للاستشارى خلاص نبدا فى مرحلة الملو و بتبقى عبارة عن مرحلتين التلبيش (و هى رمى و تثبيت المونة على الحيطة) وتانى حاجة التشطيب و بيبقى بالبروة و السفنجة و ممنوع منعا باتا التبدير او بمعنى رش اسمنت خام على المونة لسرعة الشك